ਸਤਰੰਗੀ ਜਿਹਾ

ਕਹਿੰਦੀ-
ਤੂੰ ਤਾਂ ਸਤਰੰਗੀ ਜਿਹਾ ਏਂ
ਪਤਾ ਨਈਂ ਲੱਗਦਾ ਕਿਹੜਾ ਰੰਗ
ਕਿਥੋਂ ਸ਼ੁਰੂ ਕਿਥੇ ਖ਼ਤਮ

ਮੈਂ ਕਿਹਾ-
ਸ਼ੁਰੂ, ਖ਼ਤਮ ਦੀ ਕਥਾ ਵੀ ਕੀ ਕਥਾ
ਆਪਾਂ ਤਾਂ ਵਿਗਸ ਰਹੇ
ਹਰ ਪਲ ਯਥਾ ਤਥਾ

ਆਹ ਦੇਖ ਅੱਠ ਪਹਿਰਾਂ ਦਾ ਖੇਲ
ਰੌਸ਼ਨੀ-ਹਨੇਰਿਆਂ ਦੇ ਰੰਗ-ਢੰਗ ਅਨੇਕ
ਪਲ ਪਲ ਹਰ ਪਲ ਦਾ ਮੇਲ

ਤੂੰ ਰੰਗਾਂ ਦੀ ਮੁੱਠੀ ਹਵਾ ’ਚ ਖਿਲਾਰ
ਹਰ ਦਿਸ਼ਾ ’ਚ ਜਾਵੇਗੀ ਫ਼ੈਲ
ਏਦਾਂ ਵਿਗਸੇ
ਆਪਾਂ ਵੀ ਤੇ ਕੁਲ ਕਾਇਨਾਤ
ਨਾ ਕੁਝ ਸ਼ੁਰੂ ਨਾ ਖ਼ਤਮ
ਆਪਾਂ ਪਵਣ ਪਾਣੀ ਧਰਤ ਅਗਨ ਅਕਾਸ਼

-ਪਰਮਜੀਤ ਸਿੰਘ ਕੱਟੂ

Paramjeet Singh Kattu